कोल्हापूर, लोकहिरा न्यूज वृतसेवा : श्री विठ्ठल बिरदेव फिल्म प्रोडक्शन निर्मित आणि अध्यात्म, संस्कृती तसेच युवा पिढीच्या विचारविश्वाला स्पर्श करणारा बहुचर्चित मराठी चित्रपट “भंडारा” लवकरच प्रेक्षकांच्या भेटीला येत आहे. या चित्रपटाचा भव्य टायटल लॉन्च सोहळा कोल्हापूर जिल्ह्यातील श्री विठ्ठल बिरदेव देवस्थान, पट्टणकडोली येथे भक्तिमय आणि उत्साहपूर्ण वातावरणात पार पडला.
समस्त धनगर समाज, पुजारी समाज आणि हजारो भाविकांच्या उपस्थितीत झालेल्या या सोहळ्याला उत्स्फूर्त प्रतिसाद लाभला. श्री विठ्ठल बिरदेवांच्या पावन सान्निध्यात पार पडलेल्या या कार्यक्रमाने सामाजिक, सांस्कृतिक आणि आध्यात्मिक एकतेचे दर्शन घडविले.
यावेळी चित्रपटाचे दिग्दर्शक रमेश ननावरे, छायाचित्रकार अशोक महाजन, कार्यकारी निर्माता विनायक ढेरंगे, निर्मिती व्यवस्थापक नवीन भालेराव तसेच चित्रपटाचे मार्गदर्शक निलेश बाळू कोळेकर महाराज (निळोबा पुजारी, माणदेश) यांच्यासह देवस्थानाशी संबंधित मान्यवर आणि समाजातील प्रतिष्ठित व्यक्ती उपस्थित होत्या.
याप्रसंगी बोलताना दिग्दर्शक रमेश ननावरे यांनी सांगितले की, “भंडारा” हा केवळ मनोरंजनप्रधान चित्रपट नसून युवा पिढीला आपल्या संस्कृती, परंपरा आणि अध्यात्माशी जोडणारा प्रेरणादायी प्रवास आहे. आधुनिक जीवनाच्या धकाधकीत अध्यात्माचे महत्त्व अधोरेखित करत समाजाला सकारात्मक संदेश देण्याचा प्रयत्न या चित्रपटातून करण्यात आला आहे.
श्री विठ्ठल बिरदेव यांच्या कृपाशीर्वादाने आणि समाजबांधवांच्या उत्स्फूर्त सहकार्यामुळे पार पडलेला हा टायटल लॉन्च सोहळा उपस्थितांसाठी अविस्मरणीय ठरला. चित्रपटाच्या शीर्षक घोषणेनंतर उपस्थितांमध्ये विशेष उत्सुकता निर्माण झाली असून, आता या चित्रपटाच्या प्रदर्शनाकडे सर्वांचे लक्ष लागले आहे.
अध्यात्म, संस्कृती, सामाजिक मूल्ये आणि युवा पिढीच्या भावविश्वाचा संगम घडवणारा “भंडारा” हा चित्रपट प्रेक्षकांना नवी दिशा देणारा ठरेल, असा विश्वास यावेळी व्यक्त करण्यात आला.
