भरधाव टाटा मॅजिकची धडक; महिलेचा जागीच मृत्यू!
लोकहिरा न्यूज प्रतिनिधी:- राजू टिळिंगे
तारदाळ, ता. हातकणंगले : मुलाला शाळेच्या बसमध्ये बसवून घरी परतणाऱ्या महिलेवर भरधाव टाटा मॅजिक वाहनाने जोरदार धडक दिल्याने तिचा मृत्यू झाल्याची धक्कादायक घटना 20 ऑगस्ट 2026 रोजी सकाळी साडेआठच्या सुमारास तारदाळ-बाळासाहेब ठाकरेनगर परिसरात घडली. या घटनेने परिसरात हळहळ व्यक्त होत असून, वाहनचालकाच्या निष्काळजीपणामुळे एका कुटुंबावर काळाचा घाला आल्याचा आरोप होत आहे.
पोलिसांत दाखल झालेल्या तक्रारीनुसार, पद्मिनी प्रफुल्ल कांबळे (वय 32, रा. ठाकरेनगर, 12 वी गल्ली, तारदाळ) या आपल्या मुलाला शाळेच्या बसमध्ये बसविण्यासाठी गेल्या होत्या. मुलाला बसमध्ये बसवून परत येत असताना हातकणंगले ते तारदाळ मार्गावरील रस्त्यावर टाटा मॅजिक वाहन क्रमांक MH-09-DM-4155 ने त्यांना धडक दिल्याचे तक्रारीत नमूद आहे.
या अपघातात पद्मिनी कांबळे गंभीर जखमी झाल्या. त्यांना उपचारासाठी नेण्यात आले; मात्र त्यांचा मृत्यू झाल्याचे तक्रारीत नमूद करण्यात आले आहे. या घटनेमुळे कांबळे कुटुंबावर दुःखाचा डोंगर कोसळला असून, परिसरात शोककळा पसरली आहे.
या प्रकरणी मृत महिलेचे पती प्रफुल्ल अर्जुन कांबळे (वय 37) यांनी अनिल बंडा धनगर (वय 31, व्यवसाय ड्रायव्हर, रा. चांदणी चौक, चोपडे गल्ली, तारदाळ) यांच्या विरोधात कायदेशीर तक्रार दाखल केली आहे.
तक्रारीनुसार, वाहन भरधाव वेगाने चालवून निष्काळजीपणे महिलेच्या अंगावर धडक देण्यात आल्याचा आरोप करण्यात आला आहे. घटनेची नोंद शहापूर पोलीस ठाण्यात गु.र.नं. 420/2026 अन्वये करण्यात आली असून, संबंधित कायद्याच्या कलमांखाली गुन्हा दाखल करण्यात आल्याचे कागदपत्रात नमूद आहे.
या प्रकरणाचा तपास पो. हे. कॉ. 2169 कोळी करीत असून, महिला सहायक फौजदार गायकवाड यांनी गुन्हा दाखल केला आहे.
एका आईचा मृत्यू, कुटुंबाचा आधार हरपला!
मुलाला शाळेत सोडण्यासाठी गेलेल्या आईचा काही क्षणांतच अपघाती मृत्यू झाल्याने या घटनेने परिसरातील नागरिकांना हादरवून सोडले आहे. रस्त्यावर वाहन चालविताना वेग आणि निष्काळजीपणा किती जीवघेणा ठरू शकतो, याची जाणीव करून देणारी ही घटना ठरली आहे. पोलिस तपासानंतर अपघातातील नेमकी कारणे आणि जबाबदारी स्पष्ट होणार आहे.
